Ud'oo Rabbakum - Moderation in Prayers

Soorah Al-Airaaf Ayah 55 ka tarjummah parha jaye to aik sawal uthta h k Allah Taala Dua ki baat krty hen k ise Aajzi aur Chupky Chupky mangni chahye aur phr kehty hen k wo Hadd se guzrny walo ko pasand nhi frmata. Hadd se guzrny walay? Kya mtlb?

Kuch Ayaat Quran me aisi hen k jinko smjhna aik aam insaan k liye intahai mushkil he. Jub aap un ayat to parho to aisa lagta he k aik hi ayat me shayad mukhtlf baton ko Jorr dya gya h. Hum Muztar ho jaty hen. Aur is curiosity ko harmonize krny k liye koi tafseer parhty hen. Kisi Dost se poochty hen. Ya atleast Zehn me ye irada bana kr bhool jatay hen.

Is ayat ko smjhny k liye “Asraar ul Tanzeel” parhni parhi mjhy. Aur is taddabur ka credit us book k author ko jata h.

Dua k lafzi Maani aur Usky maaangny k tareeqay se hum sub waqif hen. Ye ayat Humain isi muamly me mazeed guide krti he. Dua sirf Allah se baat krna ya Allah k samny khwahish ka izhaar krna nahi he, blky ye Ibadat bhi he. Yani Guftugu aur Ibadat ko agr combine krlia jaye to ye Dua ban jati he.

Ab dua maangny k bhi do tareeqay hen, Zahiri or Makhfee. Aap sb k saamny mehfil me beth kr ba-awaaz e buland dua kro ya phr Sub se chupp kr akely me dua kro. Is ayat me doosri type ki taraf ishara kia gya he. Aur usmy Aajzi ikhtyaar krny ko kaha gya he. Aajzi kub ikhtyaar hoti he? Tb jub insaan is baat se waqif ho k us ky aimaal is tarah k perfect nahi hen, itny sawab aur naikiyan nahi hen k Allah se dua mangy aur forun qubool hojaye. Aur jb wo insaan, jisy apny gunnaho pe nadamat ho, wo dua mangy to usme automatically Aajzi aajati he. Wo Gir Girata he. Wo Rota he.

Koi bhi normal person apny gunnahon ka usually khulam khula to aitraf nhi krta. Usy darr lgta he dunya walo se. Haan albta dunya k banany waly k samny wo aitraaf krta he, mgr Chupp kr. Firoun k baray me chand riwayat me ye kaha jata he k wo Din ko khuddai ka dawa krta tha aur raat ko chup kr Allah se Muafi mangta tha. Sarkashi Khul k hoti he, Muafi Chup k mangi jati he. Ye dunya ka ajab usool h.

Dua ki ye underlying characteristic he k Khud ko Haqeer to Jano mgr Allah ki Qudrat se Purumeed raho. Dua me Ijz aur Umeed ka mixture hona chahye. Ye baat kaafi dafa hum sun chuky hen.

Phr Farmaya  Hadd se na Guzro k Allah aisy logo ko dost nhi rkhta.

Dua me had se guzrna kya hota he? Iski Simple si explanation he k har us amal se bacho jo Sharyat k mutabiq na ho aur Jo Insaan ki Fitrat k lie nuqsaandeh ho. Dua maangny k new ways na devise kro. Biddat na ikhtyaar kro. Shiddat na ikhtyaar kro.

Phly Allah frmata he k Ijz kro, Gir Girao, Apny gunahon ka aitraaf kro, Chup kr behto, Riyakari k izhar se bacho, aur Dua kro phr frmata he k is me bhi lekin had se nhi guzr jana. Khud ko takleef nhi deni, Doosro ko takleef nhi deni. Moderate rehna he. Extremist nhi ban jana. Allah ko Aitdaal pasand h. Shiddat Nhi. Phr chahe wo Asman aur Zameen ki paidaysh me ho, Raat aur Din k Adal Badal me ho, Ya phr us maqsad me jis ky liye Allah ne Jin aur Insan paida frmaye.

Deen me Extremism nhi. Deen me moderation he. Allah ki raza aur ehsanat Mohsineen pe zyada hotay hen. Mohsineen kon hen? Ye wo log hen Jo deen me bhi aur dunya me bhi Moderation ko adopt krty hen. Kya hum sub Mohsin hen? Kya hum ne jis tarah deen ko adopt kia hua h us me hum ne moderation rkhi hui he? Ye sawal humain khud se krna chahye.

Talib-e-Dua-e-Mohsineen-o-Mohsinaat