Watasimu Bi Hablillahe Jammi’aa - Hiking Expedition

Hum ne practically khud, ya movies or TV pe dekha hoga k Aik Mountain Hikers ki team jub bhi kisi Mountain pe charhny jaati he to aik lambi si rassi use krti he, jo hr mountain hiker ko aik doosry se connect krti he. Khuda na khwasta agar un my se aik slip hojaye ya gir jaye to Us rassi ki waja se wo bach jata he, kyun uske baaqi “Connected” friends uski help krlety hen. Ab agar un hikers me se aik ne khud ko us se connect nhi kia hua to Kisi bhi mushkil ki situation me baqi hikers uski timely help nhi kr skengy and wo Nuqsaan utha skta he, yahan tk k Jaan se hath bhi dho skta he.

Ye to rahi aik Hiking Mission ki story. Humari Zindagi ka bhi to aik Mission he. Akhrat k liye khud ko tayar krna. Ye bhi to koi asaan kaam nahi he. Khud ko Dunnya ki Rangeenion aur Gunahon se bachana aur Sawaab aur Naikiyan ikathi krna bhi to aik Hiking expedition se koi kum thorai na he. Intahai Mushkil, Mushaqat wala, aur Sabar ka imtehaan lene wala aik adventure he Jis ko hum ne paar krna he. Lekin Zra ye btayen k kya is my hum gir gir k smbhlty nhi hen? Aur agar gir jayen to humain koi Life line nhi di gai? Koi rassi nhi he hamary pass? Ya hum gir jayen to phr uth nahi skty?

Insaan Jub Gir jata he, andar se toot’ta he, uska dil kirchiyon ki maanind bikhar jata he tub bhi aik cheez dil ko rahat aur sukoon deti he, usky zehn ko aik umeed aur naya jazba deti he, Uski Rooh ko Qaraar aur Taqat bakhshti he, Usko Uthati he, Phr se Chalny k liye, Apny Maqsad k Usool k liye Mehnat krny k liye. Magar wo kya cheez he? Kya wo bhi Aik rassi he? To Jawab he Haan, Wo “Habl” he “Hablillah” he. Aur wo “Hablillah” he Allah ki Ibadat..! Usky Saamny Sir jhukana..! Us se Dua Maang’na..! Uski Quran ki Tilawat krna..! Yahi wo Rassi he Jo Insan ko Mushkilat se nikalti he, Aur apny rasty pr phr se Gamzan krti he. Allah is ayat me Isi Rassi ko Mazbooti se thamny ka kehtay hen humen. Humain isky sath “Connect” rehny ko kehty hen. Isi me hamara hi to faeda he. K Mushkilat ka samna krna assan hojayega is taarah.

Magar Baat sirf Connect rehny ki nahi. Allah Mazeed fermata he, “Wa La Tafarraqu” (Aur Aapas me Tafarruqa na kro). Zahir he, Jub Rope se connected log hi apas me mutafiq nhi hongy kisi baat pe to unka sath chalna kis faeda ka? Aur kisi k “Slip” hony ki situation me wo log jo us se ikhtalaf rkhty thy, wo to uski help nhi krna chahengy. To Yaani Sirf Connect hi nahi rahna, Mutafiq bhi rehna he. Ye dono Cheezen Laazim hen is Ukhurwi Maqsad k Husool k mission k liye.

Ab Zra Aik Nazar dalen apny ird gird aur dekhen! Kya Hum ne Allah ki Rassi thaami hui he? Aur Kya Hum Apas me Muttafiq hen, Tafrqa to nhi kr rahy? To Afsos se ye kehna parega k dono questions me to hum muslmaan fail ho rahy hen. Allah ki taleemat pe amal kamzor aura pas me ikhtilaaf purzor he. Hr Banday ka deen k baaray me apna nazryea he. Hr Jga Sainkron “Daidh Eent ki Masjiden” bani hui hen. 73 Firqon me Ummat-e-Muslima Banti hui he. Focus is baat pe nahi he k In Firqon me common kya he, Blky Nazar is pe he k in my differences kya he. Aur Un Differences ko utha k hr firqa doosry firqay pe dhawa bol uth’ta he. Kahan se lagta he k Ye wuhi ummat he k Jis me Muhajireen-o-Ansaar ka Bhai-chara bemisl o bemisaal tha, jin ki Unity k baray me dunya Hairaan rehti thi, Jinky liye Iqbaal kehty thy “Munaf’at Aik he Is Qoam ki, Nuqsan bhi Aik”. Hum ne to arsa hua “Taffaraqu” ko Apnaye huye aur “Hablillah” ko chory huye. Aur is baat pe Sharminda bhi nahi hoty. Blky khud ko buht easily “Justify” Krlety hen k hum theek hen, agla banda ghalat he.

Such Poochen to, likhty huye bhi is waqt dil dukh raha he, k Humara Khaaliq humain khud keh raha h k Uski Rassi tham lo, Apas me larro Jhagro Mat, Aur Humary to Kaanon pe Joon tk nahi reengti. Kya Haal bana rakha he hum ne apna?

Solution buht simple he. Pehly to ye Smjhen k Hablullah kya he. Allah k Quran se Taaluq banayen. Phr Uski Taleemat pe Sakhti se Amal kren “Watasimu Bi Hablillahe Jammi’aa”. Aur usky Baad Ittfaaq ka jazba paida kren apny andar. Differences k Bjaye Similarities pe focus kren. Point of view rkhna bura nahi jitna uski waja se larna jhagrna and fitna fasaad phelana bura he. “Wala Taffaraqu”. Yahi wo formula he jo is Zindagi k Hiking Mission me humain kamyab kra skta he.

Talib-e-Dua